الأربعاء، مايو 16، 2007

اولى تدوينات منعم السجنية


من سجن القاهرة المحكوم بطره اكتب أولي تدويناتى السجنية ..في هذا المكان الذي تختلط فيه المشاعر والأحاسيس بين الظلم والأسر والشوق للحرية ..للأصدقاء والشوق للوحة الكيبورد التي كنت اعزف من خلالها صورة مقرؤة ومرئية لمصر .
أكتب وانا انظر للقضبان التى تحول بيني وبين الحرية ..تحول بيني وبين أصدقائي وعملي ومدونتى .. حتى انها تحول بينى وبين السماء الصافية فقد ارتسمت علي سحبها هذه القضبان التى حتى لم تترك القمر في عيني حراَ.
في هذا المكان الكئيب أحاول الهروب منه فى التفكير فى أناس وأماكن وإعمال يربطنى بهم الود وعندما أحاول أن أحاكيهم وأتفاعل معهم ياتي السجان ليغلق باب الزنزانة بعنف ليذكرنى أننى محروم منهم وليس لي أن ألقاهم إلا فى الخيال .

أبي وأمى

في هذا المكان يثور عقلى ليلاً ونهاراً وأتذكر والدى الذي لا أستطيع أن أراه وهو أيضا في هذه المرة عاجز أن يرانى فقد أعياه المرض وأقعده خبر إعتقالى للمرة الثالثة فأصبح أسير احدى أسرة المستشفيات بالأسكندرية.
أما أمى التى كان حضنها لى فى هذا المكان يخفف كل آلام السجن مر الشهر ولم استطع أن أراها لانشغالها برعاية والدي لكن عزائى أن الله عزوجل من وراءهم حفيظ وارحم بهما منى .

مدونتى أنا إخوان

تلك المدونة التى تفزع هذا النظام المهترئ .. يااااااااه كم اشتاق اليها فقد كانت هي شريكة حياتي ، افكر فيها طوال الليل واعمل لتطويرها في النهار.
إسلام لطفى كان دوماً يقولى المدونة ده جنتى.
أنا أخوان . رسالتى لنفسى ولشباب الاخوان والمجتمع ...كنت اريد ان اقول ان الاخوان بشر يحملون نفس الاحلام ..نشرب ..نجلس علي القهوة ..ندخل السينما .. نتظاهر ... ندون للحرية.
أنا إخوان ..رسالة انسان مصري ينتمي لحركة اصلاحية ..بيحب مصر ويريدها ان تتحرر من الاستبداد والديكتاتورية والفساد
أنا إخوان ..رسالة مصرية للتعايش ، شيوعي ...قبطي .. علمانى .. إخوانى .. المهم بيحب مصر.

ولصحابى سلام

وصلني تضامن كثير من الناس منهم الأصدقاء اللي اعرفهم ومنهم ناس لا اعرفهم ولا هم كانوا يعرفوني بس كتبوا عني واعلنوا عن تضامنهم معي والمطالبة بالإفراج عني لكن أحب في البداية ابعت سلامي واشواقي لشلة الثقب وخاصة محمد . وإسلام ... مفتقد دردشة محمد اوي .. يااااااه فاكر نبقي سهرنين طول الليل وتيجي توصلني وبرده نقعد نحكي تاني وأخرك علي البيت.
إسلام لطفى اللي كنت مغلبه معايا بعد القصاص ..تعالي نروح نتغذي هنا ونروح لفلان -طيب ااقولك ايه مش عين شمس جنب اكتوبر (بيته)!! تعالي وصلني وحنرجع بسرعة والله وحشتنى غلاستك اوي يا إسلام.
وكمان لازم أوجه الشكر لناس كتير مش بس اللي تضامنوا معي واللي سألوا عني وعن أمى ووالدى.
-إيمان الزميلة الوفية اللي بتشيل يلا طلبة لما بدخل السجن وكمان ربنا يكرمها بتجمع لي اوراق الدبلومة من الكلية.
-خالد سلامة : المفكر الكبير اللي ودانى في داهية وقعد يشجعني دون يا منعم - اكتب يا منعم ، ماشي يا عم خالد شفت اخرتها المحكوم.
-وشكر خاص لمدونين فاقت علاقتنا الشبكة العنكوبتية
علاء سيف ومحمد عادل وأسد واحمد عبد الفتاح وحسام الحملاوى وشرقاوي ونورا يونس ووائل عباس وسامي غربية في تونس وناس كتير اوي ثانية.
وشكر خاص لمارك لينش اللي يعتبر اول كاتب غربى يرصد فكرة مدونات الاخوان وكتب عن اخوان التدوين في الجارديان
-وشكر خاص للاخت الكبري والصديقة العزيزة الصحفية نادية أبو المجد اللي بيوصلنى سلامها علي طول.

وسط البلد

الحب مش شرط يكون بين البشر بس - فيه علاقة عاطفية قوية بتربط الناس باماكن معينة ..انا بعشق وسط البلد
بحب اوي طلعت حرب وباب اللوق وعابدين والسيدة ..والتحرير والمنيرة والقصر العيني ياااااااااااه والله وحشني شاي عم سعيد علي الندوة الثقافية وأكل شلبي او حتى مؤمن وكمان وحشني سندوش " كروك مسبو " والبرتقال من عند كوستا اللي جانب الجامعة الامريكية.
وانا قاعد سرحان مع المدونة علشان هناك فيه " واي فاى " واخر الليل اروح لبتاع الجرايد اللي في شارع المنصور علشان اكمل الليلة علي الجرايد.

واحشني صاحبى القصاص

محمد القصاص القلب الكبير واعز واغلي الإخوان والإصحاب لما دخل القصاص السجن مكنتش قادر اتخيل اني يمر علي ليلة من غير ما اشوفه لدرجة اني كنت كل شوية اطلع رقم تليفونه علي الموبايل علشان اكلمه لكن يرد التليفون انه مغلق فافتكر ان القصاص في السجن ومش هقدر اني اكلمه.
بس كان فيه فرص إنى ازوره هناك ولما تم القبض على اللى هون على إنى هتحبس معاه في مزرعة طرة ، لكن كنوع من تكبر أمن الدولة قرر إنه يفرق بينا وروحنا أقذر سجن في مصر " المحكوم " والله ليك وحشه يا ابو القصاقيص .

سارة وأنس وسلمان وحبيبة .. أيمن عبد الغنى

من فترة قبل حبسي كتبت عن صاحبي الكبير المهندس ايمن عبد الغني المحال مؤخرا لللقضية العكسرية أيمن زميل برش قديم -اتحبست معاه اول مرة في حياتي سنة 2003 وبعد كده 2006 -المهندس ايمن الكبير السن والمقام قلبه زي الطفل رقيق قوي وبيحب اخوانه جدا وكان مسخر نفسه وبيته وزوجته لخدمتنا في السجن كان دائما يسيب عياله في الزيارة يلعبوا معي ومع أمى علشان يعرف يقعد شويه مع زوجته .
في السجن أنا ارتبطت جداً بأولاده بداية من سارة المشاغبة وانس وسلمان وحتى حبيبة اللي عمرها سنتين.
لما كنت بشوف ولاده كان سلمان يقول هو انت ليه مش مع بابا في السجن اصل سلمان واخواته تعودوا رؤيتي في السجن دائما مع ابيهم.
واديني دخلت السجن يا عم سلمان بس مش مع بابا ومش قادر اشوفك بس والله وحشتني جداً.

مدونى الإخوان

يمكن التدوين عند الاخوان بدأ في وقت متاخر اوي لكنهم في وقت قصير استطاعوا انهم يبرزوا انفسهم وفكرتهم بشكل راقي
استطاعوا ان يطرحوا صورة انسانية عن جماعة الإخوان المسلمين وعبروا عن إنتمائهم بكل حرية وجرأة واتمني إن التجربة تكون بتنمو أكثر وأكثر.
وخاصة سعد وخديجة وأسماء وبلال وآل شوشه ومعاذ
وايضا شباب الاخوان المدونين ؟؟ ابن أخ - صوت عصفورة - لسان مولوتوف - يلا مش مهم - ابن خلدون
ياشباب أنتم أصبحتم تشكلون جيل من الاخوان وأصبحتم مسئولين عن تقديم صورة إنسانية عن الجماعة - جيل جرئ هيقدر يشيل هم الاصلاح في البلد دى .

بحبك يا مصر

رغم كل اللي حصل سجن وتعذيب وفساد وفقر -برضه بحبك يامصر -يمكن اكون فكرت اسيبك - لكن مقدرش اكرهك ابدا
بحبك يا مصر وعايزك حرة وحفضل ادون واكتب واتظاهر لحد ما تبقي حرة .

عبد المنعم محمود
سجن المحكوم - ليمان طره

13 تعليق:

يساري مصري يقول...

لا يوجد كلمات تصف ما اشعر به الان
كن كل إنسان مصري حر يسير على ارض هذا البلد فرض عليه ان يدعمك و يؤيدك
انت تدفع ثمن حريتنا
واحشني اوييي تدوينك و كتابتك عن الاخوان عشان آجي أعلارضك باردوا و اقول اني مش مقتنع
هههههه

ربنا معاك :)

osama elgarf يقول...

معاك ربك يا عبد المنعم ولا تيأس أبدا ...نحن جميعا فى انتظارك بل نحن جميعا فى انتظار الحرية والكرامة ونيل العزة

الفجرية يقول...

لك أنت منا يا أستاذنا سلام

ربنا يباركلك يا استاذ عبد المنعم

ويعينك ويثبتك

وتخرج أقوى من الأول وبقلم يزلزلهم اكثر واكثر

لما بتدون من جوه دلوقتى واحنا وكل الناس بنقرا ..بيبان جدا مين فينا اللى فى السجن

مين اللى بره وفاكر نفسه حر وهو مقيد بالف حاجة اولها خوفه وصمته

ومين اللى جوه زنزانة ولكن بعزمه وروحه العالية يفوق علو اسوارها

اسمتر وسيستمر دعاءنا لك ان شاء الله

إخوانية مصرية يقول...

عندك حق ياالفجرية فعلا
اول ما قرات المدونة عرفت مين فينا الي مقيد فعلا
مين فينا الي السلاسل بتحاوطه من كل جانب

ثبتك يااستاذنا واعانك واعاننا علي قول الحق والصمود في وجه الصعاب

وان شاء الله نكون قادرين علي الامانة
وعن قريب تعود الينا بقلمك الصارخ في وجه الظلم


وسنظل دوما ندعوا لك وندعوا لكل المظلومين

غير معرف يقول...

انا اول مره اكتب رد فى مدونتك يا استاذ منعم
بس بصراحه بتابعها
وانا ولله الحمد من المنتضامنين مع اى مدونه اخوانية
اللهم فك اسرك واسر من معك من المظلومين وناصرين كلمه الحق
وان شاء الله ربنا يصبرك فى محنتك وتخرج علطول بدون اى اذى ان شاء الله رب العالمين

من الـــــشــــارد

هاجر يقول...

استاذ منعم ربنا يفك اسرك قريبا وترجع تشوف والدك وتترمي في حضن والدتك وتعيش ياعم مع شريكة حياتك وربنا ما يفرق بينكم ابدا انت ومدونتك
عنوان التدوينة لفت نظري (اولي تدوينات منعم السجينة)بالعكس هي ليست سجينة التدوينة ده في منتهي الحرية ومنتهي العزة والكرامة فيه
(حتي اذا استيأس الرسل وظنوا انهم قد كذبوا جاءهم نصرنا فنجي من نشاء

monen يقول...

انا شاب من الاسكندرية اريد الانضمام لجماعة الاخوان المسلمين للكفاح ضد هذا النظام الفاسد واريد ان اعرف كيف يمكنني الانضمام للجماعة

monem يقول...

ربنا يفك اسرك يا منعم انتا وكل اللي معاك عشان والدك المريض اللي محتاجك جنبة حسبنا اللة ونعم الوكيل

monem يقول...

انا شاب من الاسكندرية اريد الانضمام لجماعة الاخوان المسلمين و اريد ان اعرف كيف يمكنني ان اشترك بالجماعة؟ ارجو المساعدة

اسلام رفاعى يقول...

ربنا معاك يامنعم وانت كنت سبب فى انى أعمل مدونة

اسلام رفاعى يقول...

monemممكن اتعرف عليك انا برده من اسكندرية ومن الاخوان كلمنى على مدونتى بحب مصر

العسكري عتريس يقول...

الحمد لله اننا سمعنا وصوتك من جوه .. ربنا يرجعلك لينا بالسلامة ..

وهكرر كلاماسلام .. انت كنت السبب اننا عملنا مدونات

وان شاء الله صوت اخوان التدوين هيوصل على طول لكل العالم

وانتم السابقون ونحن الاحقون :)

أخت مسلمة يقول...

ثبتك الله علي الطريق

انت فخر لكل مصري

فلا تجزع و اعلم ان مرادهم ان يمحوا ارادتك و اذا كانت ارادتك من ارادة الله فلن يقدروا عليك ابدا

ربنا يقويك و ينصرك عليهم

و مستنيينك يا بطل