السبت، أغسطس 23، 2008

يا بتوع الحريقة سجنتوا رفعت ليه


رفعت هكذا يناديه أصدقائه شاب مصري من الدرجة الأولي وأحد ورود جماعة الإخوان المسلمين المزهرة والمتفتحة ..أنهي دراسته الثانوية بمجموع مكنه من الإلتحاق بكلية الهندسة جامعة عين شمس ومع الدراسة شعر أن يبتعد عن ضالته وظل يحدث نفسه " أنا مش مهندس " لا أنا ..... أيوه فعلا رفعت فنان قرر يعيد السنة ويدخل كلية الإعلام هو بيحب شغل الميديا نفسه يشتغل في قناة فضائية تخصص ودخل قسم اذاعة وتليفزويون هو بيحب الإخراج والتمثيل ومثقف ينفع يعد برامج شبابية

واد زي حتة السكره تحبه من أول ما تشوفه أصل خفيف الظل مرح وخدوم يعني من الآخر واد مجدع

رفعت بيصاحب الكل والكل بيحبه أصله ألفة دفعته الكل بيرجع له , رفعت تتمثل فيه الفكرة الإسلامية الوسطية نموذج للإعتدال

عبدالقوي شفت يا أستاذ منعم عملوا ايه مع رفعت

أنا : لا حصل ايه

عبدالقوي : أمن الدولة قبض علي رفعت

أنا :ازاي وليه وامتي

عبدالقوي : كان في السينما امبارح مساء يوم 25 يوليوولاقي والده بيتصل عليه فرد عليه وقاله أمن الدولة هنا وفيه ظابط اسمه (هشام توفيق ) عايزه , رفعت كلم الظابط فيه ايه خير فرد الظابط قله احنا عايزينك شويه ورفعت رفض يجع له وقاله لما أخلص الفيلم حجيلك

ووالده أقنع ظابط أمن الدولة انهم يحضروا عنده في الصباح ولما راح بنفسه مقر أمن الدولة قبضوا عليه وحولوه لنيابة أمن الدولة العليا بتهمةَ الدعوة للتظاهر من خلال الإنترنت وانتقاد السياسة الخارجية المصرية وتكدير الرأي العام من خلال المدونات والإنترنت والفيس بوك

والنيابة قررت حبسه 15 يوم علي ذمة التحقيقات .

وساعتها قلت أنا عارف ذمة النيابة دي واسعة قد ايه أمرت بحبسه ثلاث مرات علي بنفس تهمة شباب 6 إبريل اللي اتقبض عليهم في الإسكندرية ورغم ان قضية شباب 6 إبريل انتهت إلا أن نيابة أمن الدولة أما ذمة حبست محمد 45 يوم ويوم الإثنين الماضي النيابة فكت ذمتها وأمرت بإخلاء سبيله

قلنا حيخرج يوم الثلاثاء حصل حريق مجلس الشوري قلت أكيد يخرج اليوم اللي بعديه لان أكيد الداخلية استدعت ظباطها بجرادلهم يطفوا الحريقة بس مخرجش برده

اليوم راح أبوه مكتب النائب العام يقدم بلاغ أن وزارة الداخلية لم تنفذ قراره بالإفراج عن رفعت

ففوجئ الأب أن مكتب النائب العام بيبلغه أن وزارة الداخلية أصدرت قرار اعتقال لرفعت اللي عنده 21 سنة ليه منعرفش

ليه رفت ياخد قرار اعتقال بعد افراج النائب العام محدش في البلد عارف

طيب هو رفعت عمل ايه في البلد والله لو كان بره كان جري علي النيل شال منه ويطفي الحريق أصله بيحب البلد

رفعت دايما يقول انه بيحب بلده وبيحلم يشوفه حره هو ده حلم الولد

قال يمكن أحررها لما أقدر أعرض مشاكل ولاد البلد

مفيش حد يا ناس يقولنا هو رفعت عمل ايه يمكن هو اللي قتل سوزان تميم والنائب العام مش عايز يقول عشان حظر النشر

ولا الواد رفعت يكون له يد في حريق مجلس الشوري عشان يسرق ملف العبارة

الغريب ان التهمة ان الواد هز سمعة البلد علي الإنترنت

طيب مين يحاكم اللي هز سمعة البلد في حريق مجلس الشوري

الناس ماشية في الشارع تقول دي حكومة ضعيفة معرفتش تطفي حريقه

يا جماعة رفعت ده واد زي النسمة , حد شاف والدته النهارده وهي بتقول ابني عمل ايه يا ناس حد يرجعلي ابني

يا ولد أمك يا رفعت محدش سامع عنك ومحدش بيدور عليك أصلك من اللي ميتسموش الإخوان

18 تعليق:

أحمد سعيد بسيوني يقول...

فك الله قيدك يا محمد
واعادك الى اهلك سالما معافى
اللهم امين

أنا المستقبل والأمل يقول...

ياشعب مصر علينا أن نبدأ في تنظيم وتوحيد جهدنا لإنقاذ مصر مما تعانيه ولن يحدث هذا بدون العمل الجماعي المنظم ونبذ حب الزعامة والذي تسبب في إفشال يوم ٤ مايو

الرجاء من الجميع إرسال من خمسة إلى عشرة رسائل إلى الأهل والأصدقاء وأن تسألوا كل واحد منهم أن يرسل أيضا من خمسة إلى عشرة رسائل أخرى لتعريف الناس بمبادئ وثيقة المستقبل والأمل والتي نلخصها في الآتي

١) الإفراج فورا عن كل المعتقلين السياسيين وخصوصا من أمرت النيابة بالإفراج عنهم ولازالت وزارة الداخلية تتخذ منهم رهائن ومحاسبة كل المسئوليين الذين خالفوا أحكام القانون والدستور وفورا

٢) إنهاء كل القوانين الإستثنائية والعسكرية من تطبيقها على المدنيين والحد من سلطات العسكريين وأجهزة الشرطة في الحياة المدنية

٣) البدأ فورا في تكوين لجنة عليا من أساتذة القانون أوالقضاة أو منهما معا لإعادة أو بداية كتابة وصياغة دستورالدولة ولا يكون أحدهم يعمل أو سبق له العمل في أي حزب من الأحزاب القائمة أو السابقة وذلك لوضع ضوابط ومواصفات وشروط ترشيح أو إقالة رئيس الدولة ونائبه وضوابط الهيئة البرلمانية والهيئة القضائية العليا وتحديد سلطات وإختصاصات كل هيئة بما فيها رئيس الدولة وعلى ألا تزيد فترة الرئاسة عن فترتين بحد أقصى ولا يجوز أن تجدد أو تمد بأي حال من الأحوال

٤) تكون هذه اللجنة هي النواة للجهة القضائية العليا
(Supreme Court)
وتكون ذات عدد فردي (خمسة أو سبعة مثلا) حتى لا تتعادل الأصوات عند التصويت على أمر ما

٥) لابد وأن يكون هناك إشراف دولي عن طريق الأمم المتحدة أو إحدى منظماتها للمراقبة والإشراف على سائرالعمليات الإنتخابية نظرا لإنهيار الثقة في أي نظام داخلي محايد

إننا نريد من الجميع المشاركة في العمل على تغييرالوضع الحالي وتوحيد جهدنا والإستعداد لبدء الإعتصام المدني وتذكروا إن بداية التغيير تكون بتطبيق وثيقة المستقبل والأمل فطبقوا وثيقة المستقبل والأمل

لابد أن نتحرك وإعلموا أن ساعة العمل قد حانت
والسلام عليكم ورحمة الله وبركاته

محمد خيري يقول...

فك الله أسره وأعاده إلى أمه وأبوه ودعوته

هذا نظام يعيش لحظاته الاخيرة

أحمد أبو خليل يقول...

للمزيد من المعلومات والقصص والحواديت عن رفعت يمكنكم زيارة .. الفراقد

http://faraqed.blogspot.com/

meroo يقول...

يا رب يخرجوه بسرعه وعلى خير ان شاء الله

بكل الفخر أنا إخوان يقول...

هذا هو مصير كل شاب مخلص بيحب بلدة ويريد لها كل خير
فلن يتركنا زبانيتها حتي نحلم ببلادنا كما نريدها
وهذه التصرفات انما تدل علي عجز النظام الفاشي الحاكم في مقاومة شرفاء هذا الوطن الغالي
وانا لله وانا اليه راجعون
ولن نتركهم يعبثوا في بلادنا فساد ويفسدون ف الارض
بل سنقف لهم ونضرب علي ايديهم ونعلمهم إنا قادمون .........

عبد الجواد يقول...

حسبنا الله ونعم الوكيل
ما دام ليس له علاقة بتمجع شباب 6 ابريل في الاسكندرية فما هو دافع امن الدولة في اعتقاله ؟
هل لعلاقته بالاخوان كما ذكرت سببا في ذلك ؟
المهم
فرج الله كربه وفك اسره ورده الي اهله سالما معافى من كل سوء .

غير معرف يقول...

هو فى الاصل امن الدوله محتاج سبب يعنى عشان يقبض على حد او يزور بيت حد فى الخامسه فجرا و يبعثر حاجاته و ينتهك حقه الدستورى ميت الف خط على الدستورى دى هاه فى ان يكون امنا فى بيته الامل فى الغد ياجماعه ممكن او اكيد ان شاء الله يجى اليوم اللى ينتمى فيه الناس للاخوان محدش يعملهم حاجه.............................................................................................................

حلم يقول...

ليه سؤال هو اخ؟؟؟؟؟؟؟؟؟؟؟؟؟؟؟؟ و هو كان بيعمل ايه فى السنيما
مجرد سؤال.................

إبراهيم الهضيبي يقول...

الأستاذ (حلم)
أظن الإجابة بسيطة: كان في السينما بيتفرج على فيلم إيه المشكلة؟ ولا السلفيين خلاص فعلا احتلوا الجماعة؟ وأصبحت أفكار مشروع الإمام البنا وأساتذته رشيد رضا ومحمد عبده مستهجنة داخل الجماعة
حاجة تقرف

حلم يقول...

الله معانا الله اكبر من بنى صهيون اه سورى على بنى الامن المصرى........................................................................................................

حلم يقول...

شوف يا استاذى الفاضل/الهضيبى
لست اسمى التشدد سلفى او فكر سلفى فجماعه الاخوان نفسها التى تنتمى اليها فيها الفكر المتشدد والمتوسط وال.....
و اذا كان فكرك انه عادى جدا ان تتفرج على فيلم فى السينما اوكى خلاص اذا بليتم فاستتروا ثم ان اذا كنت تريد ان تصلح الدنيا و هذا ما فهمته من انتمائك للاخوان وانا منهم واعتز فكيف تسمح لغيرك بان يتحكموا فى فكرك و اعلم انه لا يوجد فيلم ينزل فى السوق ليس فيه ابحاءات جنسيه او مشهد او اثنين مش ولابد طب ليه اعرض نفسى لكده انا لاادعى انى خالى من العيوب ولكن لا احب المجاهره بالذنب و اخيرا احب ان اقول لك ان اذا اردت التعبير عن رأيك فذلك من الممكن ان يكون بتهذيب وليس بتجريح الناس

غير معرف يقول...

المقاومة القانونية هى السبيل للخلاص من ظلم المستبد مع الدعاء والاستغفار، فهناك ثلاث أمور لفك أسر رفغت
الاولى قيام الليل بنظام مع دغاء السحر
والثانية الاستغفار قبل الصلاة وبعد الصلاة وفى جميع الاحوال
والثالثة اقامة ثلاث دعاوى قضائية
ضد رئيس الجمهورية والنائب العام ووزير العدل ووزير الداخلية
الاولى تطالب بالافراج عن رفعت نظرا لوجود تزوير فى قرار الاعتقال والذى يتطلب تفويض رئيس الجمهورية وزير الداخلية والاصل لا يوجد قرار التفويض لعدم صدوره بدليل صدور قرار الاعتقال مباشرة من وزير الداخلية دون ذكر بناء على تفويض رئيس الجمهورية.
اقامة دعوى خطف واعتداء ضد وزير الداخلية إذ أن قرار الاعتقال لم يتم تسليمه من النيابة
الثالثة اقامة دعوى تعويض نتيجة للاضرار المترتبة عن قرار الاعتقال
ولا تنسوا الحامد للمفاومة القانونية واعلموا أن الاسلام قادم رغم أنف أمن الدولة.

غير معرف يقول...

الى ابراهيم الهضيبى..بصراحة.. ايها الناس ان منكم لمنفرون وأخشى ان تكون أحدهم وبصراحة أكثر كثير من تعليقاتك...حاجة تقرف...لم أكن أعرف ان الشيخ البنا من تعاليمه دخول السينما لمضاهدة حسن ومرقص او حين ميسرة او بنات وسط البلد..اذا كان هذا فهمك لتعاليم البنا فاطرحها جانبا واسأل هل يرضى الله ورسوله عن هذا الفعل ام لا وكفاية كده أحسن طائفة المجددين الجدد فى الجماعة مثلك ومثل منعم اللى ناشر الصور اياها مش هتبطل لحد ما ندخل المواخير بحجة التجديد...ارحمونا شوية عسى الله ان يتوب علينا وعليكم.

ibnsina يقول...

السؤال هو (ليه؟)؟
ليه سجنوا رفعت ...ليه بيعملوا كل ده؟

رفعت يمثل الخطر الحقيقي على مصر...و لازم يتسجن...

عشان بيكتب مدونة بيعبر فيها عن مشاعره...

عشان بيقول للناس...ايه اللي بتعمله حكومتنا ده من نهب و بيع و سرقة و سجن للشرفاء؟

هو اخطر واحد ممكن نخاف على مصر منه...

محتاج قرصة ودن عشان يظبط العيار..و يخدم مصر بجد...
قصدي يخدم خدام مصر...
لا..لا..لا... قصدي حكام مصر...

و ربنا يفك اسرك يا رفعت

عبدو بن خلدون يقول...

ليس للحياة قيمة من دون حلم نناضل من أجله
...
سيعود إنسانا أفضل
...
أما الظالمون فلهم في مزبلة التاريخ متسع
ولهم في مزيد جهنم فوق المزيد مزيد
...
سينتصر الإنسان ولو بعد حين

غير معرف يقول...

يلعن التخلف فعلا..
معرفشي مين زفت حلم اللي داخل يقول كان في فيلم بيعمل ايه؟
هيكون بيذاكر فلسفة ولا بيصلي تهجد...

ايه القرف ده بجد، ده مش فكر سلفيين ده، ده فكر تكفيريين...

انتو مش فاكرين ان الشيخ حسن البنا استضاف زوار أجانب في الأوبرا المصرية!

ولا التاريخ تنتقوا منه ما تريدون وترموا الباقي... الله يحرقكم

محمد السيد يقول...

الراجل اللى نازل لعن وشتم وحرق
عيب
دى مش اخلاق مسلمين