الجمعة، مارس 23، 2007

دعوة لاعتصام يوم الاحد


الحق يا مصري آخر مظاهرة قبل الغاء الجمهورية واعلان مصر عزبة مستقلة
مش عايزين تعديل دستور .. عايزينك ترحل وتغور
يوم الأحد 25\3 الساعة 6 مساء هنعتصم في ميدان التحرير و نبات الليلة دي عشان نقول لأكبر عدد ممكن من أخواتنا على خطر تعديلات الدستور.
يوم الاثنين فيه استفتاء على تعديل 34 مادة في الدستور المصري دستور بلدنا اللي بيقول البلد تمشي إزاي وبيحدد حق وواجب كل واحد فينا, التعديلات دي الحزب الوطني عملها بمعرفته .. تعديلات تفصيل على مقاس جمال بيه , عشان محدش يتكلم أو يعترض أو يطالب بحقه أو يرفع راسه , مش كدة وبس كلنا هنكون مهددين في الشارع وفي شغلنا وبيوتنا وأكل عيشنا .
تعديل المادة 179 بيدي الحق لأي أمين شرطة إنه يدخل بيتك ويفتشك ويراقبك ويراقب تيلفونك ويسجلك صوت وصورة ويحبسك وكل ده بمزاجه من غير إذن نيابة ولا دياولو وبعدين يوديك محكمة عسكرية لأنك إرهابي ؛ يعني مفيش حصانة لمحامي ولا صحفي ولا قاضي ؛ يعني مفيش عدل ولا صحافة ولا قانون , وكله بالدستور يا بيه !
أما بقى تعديل المادة 88 فده بيلغي الإشراف القضائي على الانتخابات ويسيبها للداخلية وبتوع " نعم نعم يا مبارك " يطلعوا النتيجة اللي هما عايزينها . التعديلات كمان هتمنع أي مستقل يترشح للرئاسة يعني انكتب علينا وعلى ولادنا رئيس من الحزب إياه لحد ما نموت , ورئيس الجمهورية بقى من حقه يحل مجلس الشعب من غيرحتى ما يستفتي الناس ؛ يعني احنا ننتخب مجلس شعب هو ييجي يحله من دماغة ويطلعلنا لسانه .
يعني من الآخر البلد هتبقى عزبة مبارك وولده , واحنا عبيد وأنفار عندهم مالناش حقوق وكتّر خير ناظر العزبة إنه سايبنا قاعدين .
احنا بقالنا كتير بنتكلم عن الحرية والديمقراطية وحقوق الإنسان والشفافية وتداول السلطة والنهب والفساد والقطارات والعبارات والسرطان والعنوسة والبطالة والفقر والجهل والمرض و عندنا استعداد نفضل نتكلم ونحاول تاني وتالت , بس التعديلات دي هتحرمنا حتى من أبسط حقوقنا كبني آدميين وهو حق الكلام والتعبير, الموضوع مش المعارضة والناس بتوع السياسة بس , الموضوع هيضرنا كلنا , أي حد هيفتح بقه دلوقتي ممكن يبقى إرهابي مفيش حرمة ليه ولا لبيته وعرضه وحريته وكرامته , من حقنا نكون زي كل شعوب الدنيا اللي واخدة حقها والحكام بيشتغلوا موظفين عندها , من حق ولادنا يعيشوا في مصر أحسن من اللي احنا عشنا فيها , كل واحد فينا هيجيله يوم يسأل نفسه أو ولاده هيسألوه كان فين يوم ما البلد اتباعت وبقت تكية لمبارك والعصابة اللي معاه ؟!
دي آخر فرصة نتكلم واحنا لسة بني آدمين نرفض الاستعباد والذل اللي عايزينا نعيش فيه , يمكن تكون دي آخر مرة نقدر ننزل الشارع فيها نعبر عن رأينا ما هو بعد كدة اللي هيتكلم هيبقى إرهابي .
يوم الأحد 25\3 الساعة 6 هنكون كلنا في ميدان التحرير , كل الأحزاب والتيارات والاتجاهات , رجالة وستات , ولاد وبنات , هنبات ليلة في الشارع نقول كلمتنا ونوصل صوتنا ونبقى عملنا جزء من اللي علينا قدام نفسنا وولادنا وقدام ربنا , مهما يعملوا هننزل الشارع ومش هنخاف ومش حنسيب بلدنا عشان احنا أصحابها

نقلا عن مدونة علاء ومنال وبتوقيع شباب بيحلم ببكره

4 تعليق:

محمود سعيد يقول...

المفروض برضه من ربانية دعوتنا
إننا نوجه دعوة للشعب لصوم يوم الإستفتاء وقيام ليلة الأحد

يا ريت إخوانا اللى فى الإعتصام يشوفوا الموضوع ده

غير معرف يقول...

السلا عليكم جزاكم الله خيرا علي هذه الاخبار وان شاء الله هنكون متواجدين بس اعتقد ان اصلا محدش هيسمح بالكلام ده وهايفضوا الليلة قبل ماهتتعمل اصلا وربنا يستر احنا هنعمل اللي علينا وربنا يستر وكمان فكرة الاستاذ محمود رائعة لعل وعسي يحصل حاجة وربنا مع الشعب الغلبان مع ان ربنا لا يقف مع الشعب لما يكون سلبي اينما تكونوا يولي عليكم

إيمــــــان يقول...

السلام عليكم و رحمة الله و بركاته ..
جزيت خيرا اخ عبد المنعم على الخبر دة لان انا فعلا كنت مستنية اعرف اللى هيتعمل فى اليوم دة لإن مش ممكن نقول هنقاطع و نسكت على كدة_اعتقد كان هيبقى موقف سلبى اوى ومتجيش ابدا من الإخوان_بس الحمد لله ربنا مخيبش ظنى
بالنسبة لكلام الأخ محمود..معاك حق اخى احنا فعلا لازم نتفق على الصيام و توحيد الدعاء خصوصا للبنات و السيدات اللى هيكون صعب انهم يتواجدوا معاكم فى الإعتصام..
فبجد اللى يعرف يروح يوميها يروح و ربنا يعينه و يتقبل منه إن شاء الله ..و اللى مش هيقدر يبقى يحاول إنه يجتهد فى القيام و الدعاء لإخوانه و للبلد فى هذه الليلة الفاصلة...

يارب الناس تتفاعل و تحضر الإعتصام و نبطل سلبية بقى قبل فوات الأوان...

اللهم اجعل افئدة من الناس تهوى إليهم..

اللهم اجعل هذا البلد آمنا...آمين..آمين

و جزاكم الله خيرا

omar مشروع بطل يقول...

المشكلة أن الاعتصامات من تنظيم كفاية و الاشتراكيين و بيبقى العدد فيها ميزيدش عن 100 ولا 200 ..

يا ريت الاخوان ينظموا حاجة تليق بالموضوع و يشارك فيها الكل

عايزين نوصل للمليون .. المظاهرات و الاعتصامات المليونية هى فقط اللى تقدر تسقط الحكومة مش بس تمنع التعديلات